SY : <香港食好D>之泰邊爐

<香港食好D>於2017年的最後一集,食泰式火鍋做年結都算係一個唔錯嘅選擇。昨晚在泰邊爐食的東西眾多,唔一ㄧ盡錄:

1. 湯底係鴛鴦鍋–招牌泰陰公及香噴噴雞湯雞; 冬陰功湯底係淡少少嘅,唔算太酸亦唔算太辣。 打完邊爐之後,加埋各種食物的味之後,啖湯就會變濃好飲啲。 另外, 餐廳話湯底唔加味精, 寧願採用多啲嘅食材去煮湯底。(SY跟朋友都覺得是沒有味精喺裏面)

香噴噴椰雞湯係適合一啲唔食辣嘅朋友, 湯底雞湯味就冇咁濃, 反而椰子味就比較濃,湯底有新鮮嘅椰子放咗入去。 係呢個湯底淥完嘅食物都有陣椰香味。

2. 手切牛肩肉–阿貓覺得牛肩肉幾嫩滑,有肉汁及有咬口,牛味都濃郁,好食同推介。 雖然要額外叫,但係98蚊足半磅,性價比都高,值得推介。

3. 飛魚子蝦滑及黑松露墨魚滑–兩款嘅滑都係主播們的推介 , 非常彈牙。 飛魚子係令到個蝦滑帶有少少鹹香嘅味道。 黑松露加落去墨魚滑就更香,阿貓超鐘意食。

4. 秋葵同泰式黃金袋子– 秋葵唔係間間火鍋店有提供嘅, 泰邊爐有提供,所以特別想點來吃。 泰式黃金袋子係春卷皮包住豬肉冬筍同雜菜,呢個一般,唔係好食到冬筍味。

5. 泰式特飲(推介及好飲; 但係要另外加錢叫)
a. 冇酒精嘅mocktail首選薑泰茅, 裏面有香茅味加拍扁咗嘅薑蓉加荔枝汁, 甜甜地有果香, 有薑味但唔會辣(SY同朋友都好鍾意飲呢款)

b. 冇酒精嘅mocktail青頭仔, 裏面有青瓜+Lime+接骨花, 味道係比較清新啲及少甜(阿貓比較鐘意)

C. 冇酒精嘅mocktail Final Fantasy, 裏面有薄荷葉+野莓+Lime; 都係清新嘅口味, 少甜之選

d. 有酒精的冬蔭 Thai Shot, 裏面有Vodka + 指天椒 + lime + 茄汁。 飲落口,辣椒嘅辣味蓋過咗Vodka嘅辣味, 青檸汁有為成杯Shot帶來一啲清新嘅感覺, 最底層嘅茄汁係平衡番之前嘅辣味。 (SY覺得幾好飲, 酒精唔算太多, 飲咗四杯shot之後都好清醒,所以都唔使太擔心)

醬汁自助吧嗰度有好多唔同材料選擇, 其中比較特別嘅就係有紅蝦米及魚露。 甜品方面,主播比較鍾意食三色糯米飯, 紫色嘅糯米飯原來係用靚香芋做,食落口竟然食到有啲花香嘅感覺。( 我們之前以為係用紫色嘅花做成的添)
自助吧嗰度仲有一啲嘅炸物啦( 炸薯條,米通,炸蝦片, 炸雞翼等等), 仲有啲甜品,炒菜,炒飯及汽水等等選擇。

昨晚,有9100多位觀眾收睇我哋的直播,多謝支持。2018年祝大家身體健康,事事順利。

嚐味餐廳: 泰邊爐
餐廳地址: 旺角彌敦道628號瓊華中心9樓
餐廳電話: 2367 8876

發表迴響